Recientemente e team di “ILMB 2013” a presenta nan campaña “I Love My Body”. E team di ILMB 2013 ta consisti di Fundacion Famia Planea, FADA, Wit Gele Kruis, UNaids , Parlamento Hubenil di Aruba, Women’s Club di Aruba, Rode Kruis Aruba y SIPA.

E mensahe di “I Love My Body” pa 3 aña consecutivo ta encera pa stima, respeta y proteha bo mes/curpa y tambe esunnan rond di bo specialmente durante e periodo di carnaval. E campaña ta dirigi principalmente ariba hobennan den e periodo di Carnaval 2013 proximo. E campaña aki su meta ta pa conscientisa y educa tur hoben ariba e peliger y efectonan di desicionnan cu ta wordo tuma den e periodo di carnaval cu ta un temporada cu ta wordo categorisa como “periodo di risico halto” y pa sa cu nan tin e control pa escohe lo corecto.

Pa promove e campaña aki a crea un logo nobo y moderno inspira pa e hoben talentoso Jean-Marc Gomez bou guia di Shaitza Olivieira. Tambe un jingle nobo cu a wordo produci pa Jonathan Thiel y canta pa Randall Luidens y Priscella Bermudez pa asina trece e mensahenan positivo y preventivo padilanti.

E team di ILMB a bin huntu un biaha mas y reinforsa e biaha aki pa UNaids pa asina enfoka aun mas ariba e mesun grupo di meta cu ta hobennan. Lo pone enfasis mas tanto ariba e aspecto di conscientisacion cu ta enfoka ariba cambio di mente y comportacion. E instancianan cu ta forma e team di ILMB ta e combinacion perfecto mirando cu hopi biaha den e periodo aki di Carnaval por constata hopi casonan di abuso di alcohol y droga cu ta conduci na embaraso hubenil, embaraso indesea y malesanan trasmiti sexualmente.

Pa es motibo aki  cuater instancia cual ta Fundacion Famia Planea, FADA (Fundacion Anti Droga Aruba), Wit Gele Kruis Aruba y UNAids a bin cu un concepto nobo unda lo brinda e servicio pa duna workshops di conscientisacion na scolnan secundario den e periodo di carnaval. Unda den un forma interactivo duna hobennan e hermentnan necesario pa preveni diferente situacion cu nan por  encontra nan mes aden diariamente cu enfoke ariba e periodo di carnaval. E workshops ta posibel desde 3 di december 2012 te cu fin di februari 2013

Pa mas informacion y scheduling pa workshop di

Famia Planea por tuma contacto na Tel: 588-9591 of via e-mail: [email protected]

FADA por tuma contacto na Tel: 583-2999 of 583-9610 of via e-mail: j.wernet@fundacionantidroga.org of [email protected]

WGK-Aruba por tuma contacto na Tel: 594-8045/ 582-34422/ 5234428/ 5234444 of via e-mail:[email protected]

UNAIDS Theme Group Aruba na Tel: 593-6383 of via e-mail: [email protected]

Tur scol y/of instancianan por haci peticion pa un of mas workshops na e fundacionan menciona.

Na final como clausura di e campaña di “ILMB 2013” lo bai tin un debate nacional. Hobenan di scolnan secundario lo bai debati riba topiconan cu a wordo trata den e workshops duna door di e cuater instancianan.

Durante e periodo di carnaval 2013 lo bai tin programanan educativo y informativo na television cual lo hiba e nomber di “I Love My Body on the spot”. E programa educativo y informativo aki tin como meta pa yega mas serca di e televidentenan  riba topiconan di concientisacion. Un programa di di hoben pa hoben. Lo tin un serie di 3 programa cu lo trata topiconan encuanto seksualidad, droga y alcohol. ILMB ON THE SPOT su meta ta pa habri conversacionnan na cas entre mayor y yiu riba e temanan aki cu ainda ta hopi taboo. Alaves e idea di ILMB ON THE SPOT ta programanan cu lo aporta na caminda pa e Debate Nacional den luna di februari 2013.

Un campaña asina tin su gastonan y danki na diferente sponsernan cu ta kere y carga e campaña, ILMB por continua den 2013.Pa e motibo aki nos kier a gradici Kiwanis Palm Beach, Aruba Airport Authority, MIO, Aruba Tourism Authority, Kiwanis Builders Club Juliana School, Asociacion di Trabou di Hubentud  na Aruba, Portfolio, Starbucks y FullCamPro. Tambe un danki pa e cooperacion na Minister di Asunto Social Sra. Hooyboer-Winklaar, Minister di Salubridad Sr. Visser y Minister di Turismo Sr. Oduber.

Lo bai tin t-shirtsnan cu lo bai ta na benta na Fundacion Famia Planea na Dakota y San Nicolas entrante januari 2013. Tur hoben of adulto cu cumpra e t-shirtsnan aki ta contrubui den e forma aki na e mensahe positivo.