Fundacion Famia Planea cu celebracion di 41 aña

Meet & Greet: I ♥ My Body 2012
November 18, 2011
I Love My Body 2012
January 6, 2012

Fundacion Famia Planea cu celebracion di 41 aña

Gradiciendo pueblo pa e tremendo sosten

Fundacion Famia Planea cu celebracion di 41 aña

 

ORANJESTAD, Aruba 23 di november 2011 –

Famia Planea ta conmemora su di 41 aniversario riba 24 november 2011.

Famia Planea a caba di lansa su campaña “I love my Body 2012”, e campaña ta pa e temporada di carnaval pa conscientisa hobennan pa stima y balora nan mes. Durante e campaña Famia Planea hunto cu su partner nan lo organisa diferente charla educativo na scolnan basico y secundario.

 

A funda Fundacion pa Promove Paternidad Responsabel, nomber oficial di Famia Planea, riba dia 24 di november 1970 bou di e leynan di Antiya Hulandes. Y dia 1 di juli 1971, e fundacion a cuminsa opera oficialmente fo’i su prome oficina situa na San Nicolas. Aki e director y dos miembro di staff tabata tene contacto cu e dokternan pa asina compila data y provee anticonceptivo. Desde e tempo ey tambe a cuminsa supervisa e programa educacional y ora tabata necesario, e miembronan tabata bishita diferente cas.

 

E meta principal di e fundacion ta pa promove e ideanan di paternidad responsabel den tur sentido di palabra. Pero teniendo na cuenta principalmente e norma – y balornan, cultura y religion di su comunidad.

Na principio tabata pone hopi atencion riba planeamento di famia, e uzo y distribucion di anticonceptivo. Despues a mira e necesidad enorme pa pone enfasis riba facilita informacion y brinda mas educacion riba e tereno di sexualidad. Den pasado, e mayoria di miembro tabata hende muher, compara cu e hende hombernan.

 

Mester remarca cu tur e dokternan na Aruba, tabata traha hunto cu Famia Planea riba un base boluntario, brindando e miembronan di Famia Planea un reduccion den prijs. E fundacion na su turno, tabata provee nan cu e anticonceptivonan cu e dokternan tabata prescribi.

 

E ginecologonan, den e tempo ey tabatin solamente 2 y e 3 ciruhanonan, tambe tabata coopera cu e fundacion y tabata brinda nan servicio na e clientenan di Famia Planea y tur na un prijs reduci.

.

Durante traspaso di aña, Famia Planea a pasa den diferente cambio, p.e. cambio di e directornan, cambio di e miembronan di staff, cambio di e miembronan di directiva, mas hende homber ta birando miembro y sin duda … e cambionan di edificio. Un di e cambionan mas grandi ta, e mudamento di e oficina principal di San Nicolas pa Oranjestad. Den luna di juli 2009 a muda pa Oranjestad, mirando cu e cantidad di miembronan a aumenta barbaramente na Oranjestad, specialmente entre e hobennan, door di e enfasis poni riba embaraso hubenil.

Durante aña 2010, Famia Planea a celebra su 40 aña di existencia cu e pueblo di Aruba en grande, unda cu tur luna tabatin diferente actividad realisa pa henter famia bini hunto y pasa un rato agradabel y alabes haya mas informacion tocante e topiconan actual. Pa conmemora e 40 aña di existencia, a lansa un buki pa nos hobennan di Aruba. E buki aki ta un buki literario na Papiamento skirbi pa e famoso autor señora Desiree Correa y financia pa Aruba Way Foundation. E storia ta tocante sex y auto-estima pa nos hobennan di 12 aña bay ariba. Di e forma aki Famia Planea a clausura su celebracion di 40 aniversario.

 

Fundacion Famia Planea kier duna un palabra di danki na henter e comunidad di Aruba, pa e tremendo sosten ricibi durante e 41 añanan tra’i lomba y alabes invita un y tur pa sigui haci uzo di nos servicionan pa hunto nos forma un comunidad di paternidad y maternidad responsabel.

Staff & Bestuur di Famia Planea.

Login

Lost your password?

Create an account?