Famia Planea, Wit Gele Kruis conhuntamente cu CIAD trahando huntu pa e mesun meta

Na The Cinemas na Paseo Herencia a tuma lugar e lansamento oficial di e campaña di prevencion cu lo domina e temporada di carnaval 57. E campaña aki ta titula “I love my body” cu ta keda presenta pa e tres instancianan primordial den prevencion aki na Aruba cu ta; Famia Planea, Wit Gele Kruis y CIAD.

E tres instancianan aki cu ta traha ariba e tereno di prevencion a bin huntu pa pa asina enfoka mas agresivo ariba e mesun grupo di meta cu ta hobennan di 11 anja bay ariba. Mirando cu Famia Planea y Wit Gele Kruis ta traha mastanto ariba e aspecto fisico a dicidi pa traha conhuntamente cu CIAD cu ta traha mas tanto ariba e aspecto di conscientisacion cu ta enfoka ariba cambio di mente y comportacion. Esaki ta e combinacion perfecto mirando cu hopi biaha den e periodo aki di Carnaval por constata hopi casonan di abuso di alcohol y droga cu ta conduci na embaraso hubenil y tambe embaraso indesea. Pa es motibo aki e tres instacianan aki lo bay duna charlanan di conscientisacion conhuntamente na diferente scolnan den e periodo di carnaval. E mensahe di I love my body ta encera pa stima, respeta y proteha bo mes/curpa y tambe esun nan rond dibo durante e periodo di carnaval

Pa completa e campaña aki a crea tambe un jingle cu a wordo crea pa Jonathan Thiel (Biggy Boy) y Janiro Eisden cu ta zonando na e mihor radio emisoranan local. Na The Cinemas at Paseo Herencia a tuma lugar presentacion oficial di e commercial visual cu lo bay ta pasando den Cinemas pa e temporada di Carnaval 57. E commercial aki sigur ta uno hopi atractivo pa hobennan y alaves ta trece un mensahe preventivo pa dilanti.

E campaña aki den su totalidad a wordo financia pa Cede Aruba, Caribbean Mercantile Bank N.V., Manrique Capriles, Compra, Aruba Airport Authoraty y Kiwanis Club of Palm Beach y ta ensera e jingle, commercial, t-shirtsnan na benta y tambe distribucion di condooms na diferente lugar. E condooms nan lo wordo poni na diferente lugar strategico pa recoge gratis y tambe lo wordo reparti pa Womans Club of Aruba conhuntamente cu Parlamento Hubenil. Tur e materialnan aki ta representa pa e mesun diseño unico, moderno y inovativo di Shaitza Olivieira. Un diseño cu sigur lo causa furor den e temporada di carnaval cu ta saca cu diferente colornan atractivo y hopi uza pa nos hobennan. T-shirts lo ta obtenibel pa solamente 5 florin na Famia Planea na Dakota como tambe na Wit Gele Kruis na Playa.

[nggallery id=2]