FAQ

  1. Ken por bira miembro di FP?

Tur hoben of adulto (hende homber u muhe) cu ta desea pa uza anticonceptivo/condom por bira miembro. Pa bira miembro bo persona mester pasa personalmente na oficina di Famia Planea na San Nicolas of Oranjestad.

 

  1. Con pa bira miembro?

ADULTO  |  ariba di 20 aña
Hende muhe ariba 20 aña di edad, por ricibi anticonceptivo door di paga Awg. 15 pa inscripcion (un biaha so) y Awg. 35 pa aña.

Hende homber ariba 20 aña di edad, por cumpra condom.
12x IPPF condom pa awg.4,- of 12xFlavor pa awg.6,-

HOBEN  |  abou di 21 aña
Hobennan bou di 21 aña lo bira miembro gratis y lo ricibi su anticonceptivo gratis ora e trece su carchi di AZV.

  1. Si mi no tin AZV mi por bira miembro tog?

Si, bo por bira miembro. Mester solamente paga 35,- pa aña.

  1. Unda nos ta situa?

Nos tin oficina na Oranjestad.

Oranjestad

Adres: Bilderdijkstraat 16 Unit 4

Telefoon: 588-9591

Orario: Dialuna pa Diabierna, 8:00 – 4:00 nonstop

  1. Tur miembro na FP ta anonimo?

Pa bira miembro nos ta puntra pa bo nomber, adres, fecha di nacemento, estado civil, y dokter di cas. Tur e informacionnan aki ta keda na Famia Planea. Nos no ta bay duna niun hende bo informacion y e ta sirbi unicamente como forma pa controla y analysa nos miembronan.

  1. Ki ora mi por cuminsa bebe pildo?

Bo por cuminsa bebe pildo ora cu bo kier regula bo menstruacion (=ongesteld, malo di luna) of si bo ta pensa di bay ta sexualmente activo y bo kier preveni un embaraso.

 

  1. E pildo ta haci mi gordo?

Ta conoci cu e pildo ta habri bo apetito, pero asina mes ta depende di con e hormoon nan ta bay cu bo curpa. No tur hende ta wordo afecta, pero esunnan cu si subi di peso por subi 1 pa 2 kilo pa aña. Comiendo saludabel y haciendo actividadnan activo bo ta mantene bo peso stabiel.

  1. Ki ora mi tin cu cuminsa bebe pildo?

Bo tin cu bebe pildo ariba e prome dia of delaster dia di bo menstruacion.

  1. Mi ta uzando pildo pero mi kier cambia esaki pa hangua. Kico mi mester haci?

Bo persona tin cu pasa na bo dokter di cas pa asina e duna bo un receta. Cu e receta aki bo tin cu pasa FP pa nos duna’bo bo hangua. Durante bo menstruacion bo tin cu bay bo dokter di cas pa asina e injecta’bo.

 

  1. E pildo ta pa preveni embaraso so?

Alabes di solamente preveni embaraso e pildo por regula bo menstruacion tambe. Bo lo por haya menos dolor tambe durante bo menstruacion. Tene bon na cuenta: e pildo no ta protega’bo contra malesanan transmiti sexualmente.

 

  1. Despues di cuanto tempo ora mi cuminsa uza un anticonceptivo mi ta protegi?

Den e prome luna cu bo cuminsa cu un anticonceptivo ta miho pa no tene relacion sexual of pa uza un condom. Semper ta miho pa uza dos proteccion. E hende homber ta uza condom y e hende muhe tambe ta uza su metodo pa no sali na estado. Abstinencia (e decision pa no tene relacion sexual) ta unico proteccion cu ta 100% garantisa.

 

  1. Si mi uza un anticonceptivo mi por keda sin uza condom?

Condom ta unico proteccion cu ta proteha bo contra malesanan transmiti sexualmente. Dos proteccion ta e miho opcion (Double Dutch), pues e hende muhe ta protega su mes y e hende homber tambe. Tanto abo y bo pareha mester ta responsabel.

  1. Mi ta dunando lechi di pecho, cua anticonceptivo mi por uza?

Nos tin spiraal- IUD Copper T, pildo –mini pill Exluton, Depo-provera cu ta hangua y condom pa hende homber.

 

  1. Morning after pill ta un abortus pill?

No, esaki ta un pildo di emergencia pa preveni e simia di hende homber y e webo di hende muhe topa cu otro. Si esakinan a topa otro caba, e pildo aki no lo funciona mas. Despues di tene relacion sexual sin uza proteccion bo tin te 72 ora pa bebe esaki pa e preveni un embaraso. Mas lihe bo bebe e pildo despues di tene relacion sexual mas efectividad e pildo tin. Na Famia Planea nos NO tin ningun metodo (pildo) pa abortus.