Sesion 5: Friends-Check
Den e sesion aki nos lo combersa tocante amistad positivo. Alumno lo siña kico ta un bon amistad y con pa reconoce caracteristica positivo y negativo.
Obhetivo central di enseñansa basico: 2, 4, 5, 6 & 7
Duracion: 45 minuut
Conocemento
- Alumno ta siña balornan universal: amor, honestidad, respet, igualdad y paz
- Alumno ta siña reconoce norma y balornan cu e ta ricibi na cas y di sociedad
- Alumno ta siña reconoce cu e balornan universal ta percura pa harmonia den Sociedad
- Alumno ta siña e importancia di comunica
- Alumno ta siña cu conflicto ta afecta comunicacion
- Alumno ta siña reconoce e caracteristica basico di Amistad
- Alumno ta siña e importancia di ayudo
- Alumno ta siña diferencia entre grupo y por haya su luga den grupo
- Alumno ta siña reconoce sintimentonan basico: felicidad, miedo, rabia, amor y tristesa
- Alumno ta siña reconoce otro sintimentonan manera: jaloezie, berguensa, envidia, rencor, depresion
- Alumno ta reconoce caracteristicanan di tin un filosofia di bida
Habilidad:
- Alumno por indica con e ta aporta na su propio bienestar
- Alumno por duna ehempel di balornan universal
- Alumno por aplica balornan universal den su comportacion cu otro pa aporta na paz y harmonia den su comunidad
- Alumno por indica e importancia di comunicacion den amistad
- Alumno por comparti cu su coleganan di klas
- Alumno por resolve conflicto por medio di comunicacion
- Alumno por indica diferente caracteristicanan importante di amistad
- Alumno por defende su mes y otro
- Alumno por aporta na un sociedad habitabel
- Alumno por aplica diferente regla y tarea den grupo
- Alumno por reconoce sintimento basico cerca su mes y otro
- Alumno por indica sintimentonan manera jaloezie, berguensa, envidia, rencor, depresion
- Alumno por indica e aspectonan importante pa anda cu otro
Actidud:
- Alumno tin respet pa norma y balornan di su sociedad
- Alumno ta dispuesto pa aporta na harmonia di su sociedad
- Alumno ta capas di comunica
- Alumno ta capas di duna respet den combersacion
- Alumno ta capas di mustra empatia pa diferente situacion di su compañeronan
- Alumno ta capas di demostra balor pa otro
- Alumno ta capas di traha hunto
- Alumno ta capas di tuma iniciativa pa defende su mes y otro
- Alumno por comunica habri, sincero, cu respet y empatia
- Alumno por responsabilisa su sintimento
- Alumno por resisti emocionnan manera jaloezie, berguensa, envidia, rencor, depresion
- Alumno por duna respet pa su propio filosofia di bida y di otro
Structura:
Introduccion
Awe nos ta bay papia tocante algo cu boso tur por relata boso mes cu ne: Amistad! Amistad por haci bo feliz pero tin biaha e por ta dificil tambe. Awe hunto nos ta bay descubri kico ta un bon amistad y con bo mes por ta un bon amigo.
Ta habri e les cu algun pregunta;
– Lanta para si abo tin un bon amigo/a den klas
– Lanta para si abo a yega di rabia cu bo amigo/a
– Lanta para si abo gusta hunga den pauze cu bo amigo/a
– Lanta para si abo tin un amigo/a cu semper ta honesto
– Lanta para si abo tin mas cu 3 amigo/a
– Lanta para si abo ta yuda bo amigo/a cu huiswerk
– Lanta para si abo a yega di pone bo amigo hari
– Lanta para si abo si un amigo/a a yega di haci bo feliz ora bo tabata tristo
Tur persona tin un diferente experencia cu nan amigo/anan. Tin biaha nan ta cosnan leuk pero tin biaha e por tin momentonan menos leuk. Ban siña reconoce miho kico ta haci un persona=un bon amigo/a y con nos mes por bira e bon amigo/a.
Nucleo
Awo nos lo bay wak hunto kico ta parti di un bon amistad y kico no. Nos ta bay haci un FriendsCheck awe.
Practica cu e alumnonan;
Dividi e klas di grupo di 3/4. Cada grupo ta ricibi un stapel di carchi. Bo tarea ta simpel, pone e carchinan den dos grupo; Bon amigo of no ta un bon amigo. Si bo tin duda, papia den bo grupo, pasobra tin biaha un persona ta pensa si y e otro ta pensa no. Esey ta locual lo hacie interesante.
Elabora Klasikaal;
Cada grupo tin cu splica tocante 1 carchi cu nan a scoge den e stapel di bon amigo y un di no bon amigo
|
FriendsCheck – Bon amigo |
FriendsCheck – No bon amigo |
|
1. Ta scucha bo ora bo ta papia |
1. Ta hari bo ora bo haci algo fout |
|
2. Ta tene un secreto pa su mes |
2. Ta conta bo secretonan |
|
3. Bisa sorry ora e haci algo robes |
3. Ta bisa bo; si bo no haci esaki, bo no ta su amigo mas |
|
4. Ta puntra si bo kier hunga |
4. Ta coy bo cosnan sin puntra bo |
|
5. Ta comparti cos dushi cu bo |
5. Ta papia malo di bo, ora bo no t’ey |
|
6. Ta duna bo sosten ora bo ta sinti tristo |
6. Ta pusha bo |
|
7. Acepta bo manera bo ta |
7. Ta papia cu bo solamente ora e mester di algo |
|
8. Ta respeta bo limitenan (p.e. si bo no kier un brasa) |
8. Ta bisa bo no mag di join e wega |
|
9. Ta pone bo hari |
9. Ta haci joke cu no ta leuk di bo |
|
10. Ta encurasha bo |
10. Ta rabia si bo bisa no |
|
11. Ta defende bo si un hende trata bo malo |
11. Ta laga bo na caya si bo mester di yudansa |
|
12. Ta tene cuenta cu bo sintimentonan |
12. Ta yama bo, pa nomber cu no ta bunita |
|
13. Ta honesto cu bo |
13. Ta uza bo secretonan pa tenta bo |
|
14. Ta yuda bo cu tarea si bo ta hay’e dificil |
14. Semper kier manda |
|
15. Ta felicita bo ora bo haci algo bon |
15. Nunca ta bisa despensa of danki |
|
16. Ta duna bo compliment |
16. Nunca ta comparti cu bo |
|
17. Ta feliz ora abo ta feliz |
17. Ta haci bofon of hari otro muchanan |
|
18. Ta puntra bo con bo ta sinti awe |
18. Ta comparti potret of msg di bo sin permiso |
|
19. Ta duna bo bon conseho |
19. Ta dal bo paso bo no haci locual el a bisa bo |
|
20. Ta scucha bo cu atencion |
20. Ta papia cos di bo cu no ta berdad |
Clausura
Un reflexion cortico:
Nos a caba di descubri kico ta un bon amigo y kico no. Pero awo mi kier boso pensa unrato riba bo mes: con bo ta un bon amigo?
Completa e frase:
– Mi ta un bon amigo pasobra ……
– Mi kier ta un miho amigo door di …..
Recordatorio:
* Tende otro
* Tin respet pa otro
* Sea honesto
* Haci otro feliz
Tur persona por scoge pa ta un bon amigo. Pues mi kier boso keda pensa con mi por ta un bon amigo pa un compañero den klas.