Malesanan Transmiti Sexualmente (MTS)
Una bes cu un hende ta activo sexualmente  y no ta usa proteccion e ta mas vulnerabel pa haya Malesa Transmiti Sexualmente.E unico metodo anticonceptivo cu por preveni esaki ta usa di condoom. Sea ta e condoom masculino, cu ta mas popular of e condoom femenino.

Sintomanan mas conoci di MTS

  • Kimamento of dolo ora di orina.
  • Yaga den e region genital, sea cu nan ta haci dolo of no.
  • Grawatashi den e area genital.
  • Un fluimento for di e penis of e vagina.
  • Dolo bou di e stoma of den e area pubico.
  • Un rasca den e palma di man of planta di pia.
  • Perdemento di hopi peso, posibelmente hunto cansansio continuotur ora, of klier hincha of duro den bo nek, bou di bo brasa of den bo las.

Chlamydia

MTSChlamydia ta wordo causa dor di un bacteria cu ta bai sinta/implanta den e cuero fini (slijmvliezen) di e organonan sexual. Chlamydia por causa un infeccion na e canal orinario, na e anus cerca hende muher y tambe na e boca di matris. Hende muhe mayoria biaha no ta sinti nada di un infeccion cu Chlamydia. Tin biaha no tin ningun sorto di sintoma of nan ta masha tiki. Pesei por sosode cu e hende muhe ta keda cana cu e infeccion di Chlamydia sin cu e sa. Chlamydia ta causa bashamento color blanco/color di slijm, hende homber ta haya molester ora di orina. Un infeccion largo di Chlamydia por causa infertilidad cerca hende muhe y malesa di inflamacion di pelvis. Hende homber por haya infeccion urinario y infeccion di prostaat. Chlamydia por wordo trata masha simpel mes si e wordo diagnostica na tempo.

Fretnan genital

Fretnan genital riba of rond di e organonan sexual (of e anus) casi tur ora ta wordo transmiti door di relacion sexual sin proteccion. Fretnan genital ta wordo causa door di un virus. E virus aki por wordo transmiti tambe door di usa por ehempel un serbete of un serbete di baña di un persona cu tin fretnan genital. Despues cu e infeccion tuma lugar, por dura un par di siman y tin biaha hasta un aña prome cu e fretnan sali. Hopi biaha tin un par di fret chikito prome y cu ta bira mas grandi y mas hopi.

Nan por causa grawatashi of irrtacion. Dor cu e fretnan tin biaha ta den e organo sexual nan no ta wordo mira tur biaha. Fretnan genital (condylomata acuminate) por desparece di mes, pero e virus ta keda den e curpa. Pesei por ta posibel cu e fretnan ta bin bek despues di tratamento medico. Un tratamento medico ta consehabel, paso fret venerico por causa blokeamento di canal di e vagina, penis, rectum, garganta y ambe ta wordo relaciona cu cancer di cervix (matris) y anal. Mas lihe nan wordo trata, mas chikito e chens ta cu e fretnan ta bin bek.

Drip/gonorrea

MTSDrip/gonorrea ta un infeccion contagioso cu ta hopi severo. E ta wordo causa door di un bacteria. Si un hende homber tin’e e ta haya esaki despues di un par di dia te cu dos siman di e relacion sexual sin proteccion. E por tin bashamento color geel-berde (pus) for di e penis. E por haya tambe dolo y kimamento ora di orina. Hende muhe hopi biaha no ta sinti nada. Gonorrea anal of vaginal por trece un tiki mas bashamento cu normal. Gonorrea oral or duna tiki mas dolor di garganta. Si no ripara nada di e drip/gonorrea, e infeccion aki por tin consecuencianan hopi grave manera sterilidad. Hende muher por haya malesa inflamatorio di pelvis y hende homber por haya infeccion di prostat. Un recien naci por nace ciego.Drip/ gonorrea por wordo trata masha simpel mes, si cuminsa cu e tratamiento medico trempan.

Herpes Genitalis

Herpes genitales ta wordo causa door di un virus.

MTSSintomanan di herpes genitales ta e blarnan ofheridanan chikito cu ta masha doloroso den e area genital. Herpes ta wordo transmiti door di contacto cu e uitslag riba e cuero of cu e slijmvlies di boca, penis, anus of vagina di un persona cu tin herpes. Herpes ta hopi contagioso. Vooral e momento cu e persona tin blaarnan of heridanan chikito. Mayoria bes entre dos pa diez dia despues di a wordo infecta cu e herpes virus, e prome sintomanan ta aparece. E ta varia hopi. E infeccion/uitbarsting primario mayoria biaha ta bai mas fuerte. Por experiencia orinamento cu dolo, kliernan hincha, keintura y dolo di curpa. Mayoria biaha e virus ta bin bek na e momentonan cu e resistencia ta suak. Herpes Genitalis por afecta e baby durante di parto. Tin remedi pa alivia e dolo y molester y pa haci e atacanan di dolo menos.

HIV

MTSHIV ta e virus cu ta causa AIDS. E virus aki ta afecta e sistema di defensa di un persona. Dor di esaki e curpa ta menos proteha contra diferente malesa. E infecion cu HIV ta severo y no tin cura ni vacuna p’e. Un test di sanger por mustra un infeccion cu HIV. Bo por wordo infecta door di contacto sexual,comparti hangua infecta, transfusion di sanger y di mama pa y’u (durante embaraso). Despues di wordo infecta por dura 10 aña prome sintoma severo aparece.

Mientras tanto e virus por wordo transmiti si. Sintomanan ta cansancio constante, sodamento anochi, keintura frequente, klier hincha, diarree constante, poco apetit, tosamento seco, mancha blanco of blaar den boca. Te despues cu e sistema di defensa wordo afecta y e sintomanan aparece, un dokter por diagonistica AIDS. Door di complicacion grandi di infeccionan un persona por muri.

Syphilis

MTSUn MTS cu ta causa pa un bacteria (Treponema pallidum). E infeccion ta cuminsa cu un herida na e penis of vagina. Despues di tempo si e no wordo trata, e bacteria ta sigui move den henter e curpa causando daño na organonan.


Platleis

Platleis/pieu ta un infeccion fastioso pero no peligroso. Platleis/pieuw ta wordo transmiti dor di contacto sexual, pero por wordo transmiti tambe dor di usa mesun paña of dor di drumi pega cu un persona infecta . Bo mes por constata cu bo tin platleis y trat’e cu un tratamento ‘normal’ contra pieu. Bo por cumpra esaki na botica.

Sarna

Sarna mayoria biaha ta wordo transmiti door di freimento pisa y intimo. Bo por hañe tambe dor di drumi den mesun cama cu un hende cu tin’e of dor di bisti paña di un persona infecta.Sarna por wordo trata cu un crema of gel of dor medicacion oral. Paña di cama, serbetenan y pañanan di bisti mester wordo laba. Despues di tratamento medico e sarna por keda duna grawatashi despues di basta tempo. E grawatashi por keda pa un par di siman. Ta importante ta pa e partner(nan) y kisas otro hende cu por a comparti cama of paña cu un hende infecta haña tratamento tambe. Aunke cu nan no tin e sintomanan nan por ta infecta tog. Sarna ta wordo causa dor di un insecto chikito (schruftmijt). E insectonan ta coba gangnan chikito den cuero di hende anto ta pone nan webo den nan. E webonan ta brui despues di 3 pa 4 dia. Sarna ta fastioso pero no peligroso.

Con por reconoce un persona cu ta infecta cu HIV

No tin ningun manera pa sa si un persona ta infecta si bo djis wak e persona. Un hende homber of un hende muhe cu bo topa na trabou, scol,centro deportivo, den un club nocturno, un bar of riba caya por ta infecta cu e virus pero mustra completamente saludabel. Durante e periode ei, toch e por infecta un otro persona.

Kico mester wordo haci pa ta proteha di HIV

No tin un vacuna pa proteha hende di infeccion cu HIV. No tin cura pa AIDS tampoco. Esaki kiermen cu e unico manera sigur pa evita AIDS ta pa na prome luga preveni pa keda infecta cu e virus, dor di haci uso di condom.